↔
დესპანი
შენ სამშობლოში შენი ოჯახის დესპანი უნდა იყო და სამშობლოს გარეთ - შენი ერის დესპანი,
რადგან შენი საქციელი შინ, შენი ოჯახის სახეა და გარეთ - შენი ერის! ...
ჭაბუა ამირეჯიბი - "დათა თუთაშხია"

პოეზია · ლირიკა

მეტამორფოზა

სტურუა ლია

2013-05-121 წთ საკითხავი18608 ნახვა

—
შეუმჩნეველი კაცი იყო,
მთელი სიცოცხლე
ქალაქურად მოხრილი მხრებით
ოჯახისა და სამსახურის ჯვარს ატარებდა,
მაგრამ როდესაც მისი შვილების
ფრინველივით გაწელილ ყელში
ჩამდგარ წკრიალს
მსუყე შეჭამანდს დაასხამდნენ
და კოცონივით ჩააქრობდნენ,
ის გავიდოდა მაშინ სახლიდან,
ხელებს უღონოდ აიქნევდა
და ხედ იქცეოდა,
ხოლო შვილები - ვარსკვლავებად,
მის ტოტებზე ჩამოსხდებოდნენ
და გამჭოლავი სიახლოვე იყო მათ შორის...
ძალიან მალე
ტკივილის სიბრძნეს ეუფლებოდნენ
და ნირშეცვლილი ბრუნდებოდნენ
ბავშვები სახლში,
რომელიც ყველა კუნჭულიდან
შელახული თეთრეულის ვარდებს აფრქვევდა...
მაგრამ ის კაცი, ხედ რომ იქცა,
და ცას შეეხო
არც თუ ისე მაღალი შუბლით,
ვერასოდეს ვეღარ დაბრუნდა,
მას სიკვდილივით ეშინოდა
ნახვა შვილების,
რომელთა ლტოლვა ვარსკვლავებისკენ
მაინც ჩაახშო
ნოყიერი საჭმელების ხვატმა...

სტურუა ლია: სხვა ნაწარმოებები

მსგავსი ნაწარმოებები

დესპანი