↔
დესპანი
შენ სამშობლოში შენი ოჯახის დესპანი უნდა იყო და სამშობლოს გარეთ - შენი ერის დესპანი,
რადგან შენი საქციელი შინ, შენი ოჯახის სახეა და გარეთ - შენი ერის! ...
ჭაბუა ამირეჯიბი - "დათა თუთაშხია"

პოეზია · ლირიკა

ნანატრი სიმარტივე

სტურუა ლია

2013-05-121 წთ საკითხავი18605 ნახვა

—
A პუნქტიდან B პუნქტში
მიმავარ მატარებელს
მთელი ჩემი მათემატიკა გავატანე,
ლექსის მადანი და სიყვარულის სნეულება.
გამრავლების ტაბულა,
“მახსოვს პირველად სასწავლებელში”
და ბანქოს ქაღალდზე
დაწერილი ფლირტი
დავიტოვე სისადავისკენ მიმავალ გზაზე,
სადაც ყველაფერი ტვირთმოხსნილი ჩანს:
დედაჩემის სული, რომელმაც
დაისვენა ჩემგან,
ცამ _ ყოველგვარი სიმბოლოებისგან,
ერთადერთი დანიშნულება _
მოხუფული ქალაქის სარქველობა,
ამ ქალაქში დგას ჩემი სახლი,
სახლში ტელევიზორი, საიდანაც
ყოველდღე მკლავენ ვირუსები, ტერორისტები,
ქერათმიანი ბრედ პიტი
და ჯერ კიდევ ცოცხალი ვარ.
ამაზე ბედნიერი სიმარტივე
რაღა გინდა!

სტურუა ლია: სხვა ნაწარმოებები

მსგავსი ნაწარმოებები

დესპანი